El eskritor espanyol Unamuno definio el lingwaze komo la "sangre de muestra alma". Ke mejor modo de deskrivir el intimo enlase de los Sefardim kon su lingwaze, el Djudeo-Espanyol. Uno es sinonimo del otro. No puedes ser Sefardi si tus parientes o tus abuelos no komunikaron en muestro amado lingwaze.
Mismo si pedrites el uso del Djudeo-Espanyol tienes dainda en tu korason, en tu alma, en eskarino por este enlase ke te izo parte de la nasyon Sefardi.
Se puede ser ke pedrites la kapacidad de gwadrar este lingwaze kunado tus abuelos se fueron en Portugal i de alla se dispersaron por el Sud-Oeste de la Francia, Holandia, Ingleterra i el kontinento Amerikano. O lo pedrites kuando se fueron en los Estados Italianos, el norte del Maroco o el Impero Otomano. Se puede ser ke lo pedrites kuando las eskolas de la Alainsa te ambezaron en Frances i te disheron ke tu lingwaze, el Djudeo-Espanyol, era muerto. Se puede ser ke lo pedrites kuando, por razon ekonomika, tu familia se fue a l'Evropa del Oeste, a l'Afrika Sentral o a l'Amerika del Norte. Se puede ser ke lo pedrites kuando el nasyonalismo lingwistiko de los estados suksesor del Impero Otomano te forsaron a ambezar los lingwazes lokales.
Ma dondekiera ke te andartes, si te kazastes kon alguno ke no era de "los muestros", si no pudias ambezar a tus kriaturas las pokas palavras de Djudeo-Espanyol ke t'avias akodrar, gwadrastes en el fondo de tu alma el eskarino de este lingwaze ke tominos kon mosotros kuando salimos d'Espanya en 1492. En verdad era la unika kosa ke podiamos tomar kon mosotros!
I agora mismos este rekuerdo esta amenazado por algunas organizasyones i personas ke pretenden ke ser Sefardi es solo sinonimo konunos kuantos rituales Djudios i pronunsyasyon ebrea, i nada mas.
Para estas personas, muestro lingwaze, muestra erendensya, muestras tradisyones, muestra kultura, muestra istorya, muestra manera de vida ke sostenimos kon fidelidad por los ultimos 500 anyos, no pezan del todo. Pretenden ke el lingwaze es nada i la relizyon es todo. Yaman ansina komo Sefardim a muestros ermanos Djudios Mizrahim ke vienen de Bokhara o de Marrakech, de Damas o de Teheran, de Basra o de Harrar, de Bombay o de Sana'a.
Es verdad ke rogan komo mosotros, ke kantan komo mostros, ke tienen los mismos rituales, ma estos no son karakteristikas Sefarditas, mas bien ke karakteristikas Djudias. Si los Ashkenazim trokaron el sendero tradisyonal Djudio, esto no haze los grupos Mizrahim sosyos de la nasyon Sefardita.
Es la ultima ignoransya de kontinuar a insistir ke la nasyon Djudia tiene solo dos divizyones kulturalas importantes, los Sephardim i los Ashkenazim.
Estas organisasyones i personas ke persisten en sus aljasaras simplistikas impeden el derecho de los Sefardim de identifyarse no solo a traves sus relizyon, ma tambien a traves sus erensya i specialmente sus istorya.
I la istoryade los Sephardim es klara. Fuemos dezraygardos de Espanya porke eramos Djudios, ma mos yamamos Sefardim porke vinimos de espanya i gwadrimos bivas muestro lingwaze i muestra kultura espanyolas para muncho siglos. I denguno no mos deve robar de esto.
Ser Sefardim, kuando salimos de Espanya, no kere dezir ser Djudios solo, ma tambien ser el luzero de una tradisyon espanyola a la kuala mos apegimos por los ultimos 500 anyos.
A estas organisasyones i personas ke tienen un temario ke agwente de kalkiera manera muestra definisyon de Sefardi, les digamos no proban de opwestar el pezgo de la istorya; en fin la verdad vensara.